再戰新京極 Day 3 下

貴船神社

經過45分鐘既路程，終於爬到上黎貴船神社，好感動。

參道兩旁的紅色獻燈

貴船神社最出名就係佢既神水同埋靈泉水籤，據聞當初係詩人和泉式部係呢度祈求同夫婿既感情變好，所以令到呢度咁出名，不過最後和泉式部都係同老公分左手。
除此之外，參道兩旁既紅色獻燈都好靚，行左咁耐，見到咁靚既景色，真係唔覺得攰。

參道旁的獻燈

繼續洗手團，黎到點可以唔洗手呀，呢度洗完，仲上左神水個度洗tim。
洗完手仔，見到有個亭有位坐，行左45分鐘，真係要抖下。都坐左幾耐，影下相，飲下水，有陣時仲有D風吹下，好舒服，坐完休息完就要參觀貴船神社啦。

時值七夕，有好多呢D俾人掛上許願字條既樹。俾人遮住既兩隻馬，係水神，佢地係高龍神和暗龍神，供奉佢地祈求干旱時降雨，水災時雨停。

神水

神水同戀愛靈泉占卜，點占卜法呢? 就係買張空白既占卜紙，放落水度，過一陣就有字浮現出黎架啦，好多人都有黎呢度占卜，不過我地只係洗手就算。

再睇下盛夏既紅葉同大自然既景色啦。

離開貴船神社，今次我地毫不猶疑地選擇搭車落去，因為再頂唔順又一次45分鐘既旅程。等左陣車，上到車，冷氣超涼，唔駛5分鐘我地已經去到貴船站... 好大既諷刺... 5分鐘車程vs 45分鐘行路，不過唔行過又唔知大自然係咁靚既。

電車站

搭返電車去返出柳町，今次架車好豪華，應該係觀光車黎，超正，D位可以轉做望窗口，不過已經俾人坐哂lu。

好舒服咁坐返去出柳町，一路上田園既風光~

出返市區

返到出柳町就搭巴士去新京極同錦市場，由於塞車既關係，黎伯年紀大身體弱，坐坐下車就訓著左lu

，我地兩個精力旺盛既人就係度無所事事，睇下街景，最主要係聽住停站廣播，因為黎伯訓左。

偷拍中

去到錦市場，我地認清目標，衝去買清酒先，每人掃左兩支，再去買CC Lemon補充體力，our favorite ~ CC Lemon~ CC Lemon~

 一路飲一路行，去返賣飾物既鋪頭買手信，黎伯都買左幾條送俾人，當然佢係唔會買俾自己既，再去左3 mins happiness，睇中左個手信俾呀慧(ps. 到依家都未俾到佢......)，再行左好多鋪頭，見到呱呱老公多啦A夢化做呱呱，雖然唔係正版，但都要買返去送俾呱呱。之後行返去賣umbrella既鋪頭，買左兩把雨傘，超靚!!!!!! 一把係黑白dot柄，一把係紅底藍邊。黎伯就.....企係度俾D模稜兩可既意見俾我地。

給呱呱的手信

呢隻野只係按下佢心口既黃色心心，個樣就會幻變三個表情。

Our beloved C. C. Lemon

手信: 清酒，個樽好靚呀~~ 766 yen一支

一場來到日本，我地覺得應該去食下咖哩飯，所以就去左間好快餐既鋪頭食，即係自助買票圍住個類似bar臺既物體坐個D，我地三個都係叫咖哩飯，最普通個隻，雖然普通，唔係配豬排個D，但係都好好食，at least我地覺得好exotic，因為要食下日本咖哩先覺得黎過日本(超無聊既諗法)，不過可能得個一個人係bar 臺，所以成日都唔refill water俾我地，要我地叫佢先記得我地既存在。

食完dinner就返歸，去搭巴士，唔知點解都好多人，好迫，差D落唔到車，落車位唔近hostel，要行5-10分鐘度，不過俾我地經過鴨川，睇到河邊既餐廳開住燈，都係唔錯既夜景，我地仲係度玩相機，狂影相，影D車既燈光。

京都市內既夜景，都可以好繁華。

係馬路邊玩左好耐既玩意....

行返去既途中，見到間幾好食既餐廳，決定聽日會試下，又見到99yen店，入去買左第二朝既早餐就閃人喇，之後去左便利店拎左D免費報紙，用黎塞住清酒個盒，等擺入行李寄倉時冇咁易碎。

返到去好攰，不過我地玩左陣先訓。

黎伯第一個嘗試，之後佢就做左攝影師