親親大自然之貴船神社 Day 3 中下

係下鴨神社離開，準備去親親大自然。

我地係下鴨神社門口搭巴士去出柳町駅前搭叡山電鐵去貴船，日本巴士既好處係個巴士牌會顯示架車去到邊，我地係等車既期間，唔知點解喪係度唱兒歌，唱到黎伯就快癲，唱唱下仲唔係好記得IQ博士係點唱，諗左好耐，三個人都冇一個諗到囉。

等巴士途中自娛

都等左幾耐，俾好多日本人歧視完，終於有車出發去搭電鐵啦。
要坐成半個鐘先去到貴船，落車之後都仲要行半個鐘先去到我地既目的地貴船神社!!!
其實，係貴船站有巴士直接坐上去貴船神社，但我地諗住既然有時間，又既然難得黎一次，不如行上去啦，呢一行，就行左45分鐘... ...

不過一路上都幾好風光，樹林密佈，又有小溪，沿路都有人行上去既，一兩個囉，亦都有人行落黎，都係一兩個... ... 呢個景點簡直係親親大自然既高潮，真係四眼無人，又唔係太知幾時先行到，好似行山咁，真係幾頂癮。我地呢D城市人平時運動又唔多，今次旅行真係喪行。

好高既樹

除左我地，都有其他人架

但真係唔多人行，不過咁樣行上去貴船又另有一番風味

行行下，我地見到有議員係度賣選舉廣告，仲要沿路見到幾次，估唔到連郊區地方佢地都唔放過要賣下廣告。

親親大自然

納涼河床

行到差唔多，開始見到D鋪頭餐廳，有納涼河床，呢個環境同京都市內既環境又唔同，呢度有feel好多。之後仲俾我地見到紅葉，話哂都7月頭，點解會有紅葉既，我地都係度諗究竟係真定係假，不過我地都幾好彩呀，影返D相扮係秋天去都得。

夏天的紅葉

行上去，真係勁攰，好彩俾我地遇到救命水，勁清涼既山水，清涼既程度係達到冰水級，我地係度洗面洗手，等自己降溫，冇左佢，我諗我地三個都一定頂唔順。

救命水

超級清涼

人地話半個鐘既路程，我地行左成45分鐘，究竟係我地行得慢，定係本身就要行咁耐?