We are ready for 上海蘇杭 Day 1

11/7/2008


紅磡 --> 火車


點解會返黎香港抖一日呢? 其實本來係有機票可以飛日本停上海，咁就可以一次過完成旅程，不過tax同附加費加埋一齊好貴，所以我地就係日本返黎香港抖一日再出發去上海蘇杭。其實咁都好，俾我地放返低係日本買既野，洗下衫，再執返好個行李再度出發!!!


大家約好係紅磡火車站等，我記得之前6月份去北京時都唔駛過X光機check行李，但過左一個月就要排隊check行李喇，可以臨近奧運啦。


過左關就係候車室等車喇，等夠鐘入到車廂先發現架車爆多人，差唔多full哂..... 明明我去北京都冇咁多人..... 真係咁多人去上海?


我地既車卡係硬卧既第一卡，前面就係軟卧，硬卧同軟卧之分除左價錢外，仲有床舖 (當然係硬卧硬D啦，其實軟卧都唔軟得去邊)、廁所 (軟卧係坐廁，不過咁多人去過，坐廁你又夠唔夠膽坐落去呢)、床位數目 (硬卧有六張，軟卧有四張，空間多D，而且軟卧D房係有門既，硬卧就冇，D人行過就睇哂入面架喇)。我地買左兩張下鋪同一張中鋪，黎伯當然唔會錯過咁難得既機會訓下中鋪啦  (其實係俾我地迫既)，黎伯一開始就練習上床落床，睇住對面個呀婆又係訓中鋪，好輕巧就上左床，黎伯真係望塵莫及呀，所以佢就選擇上左床之後，唔再落黎喇，wahahahahahaah。


冇係火車上影相，只派左donald同mr. banana做代表

佢地坐係黎伯既中鋪影相，不過係之後既旅程，佢地冇再出現過喇...

以下呢幾張相係我由北京坐火車返香港影既，其實北京/上海至香港既車廂都係咁既樣

中鋪和上鋪

由香港去上海要19小時，我地係11/7 3點幾開車，去到上海就係第二日(12/7/2008) 11點幾，其實如果有時間，坐火車都唔錯，又平，來回夾埋800幾蚊度。如果有時間去玩，都真係幾好架。

係火車上既19個鐘，我地玩下訓下，自己帶杯麵食，火車上都有飯盒供應，回鍋肉之類。


可能火車上太多人既關係，成日都keep住係個好嘈既狀態，特別係我地係硬卧既第一卡，好多係軟卧既細路跑黎跑去，一過到黎見到我地個車廂，就係門口大叫「嘩! 呢度訓6個人架」，幾次俾佢地嘈醒...... 仲要係每次經過都要咁樣嗌一嗌.....


之後仲慘，隔離房既細路開始唱歌，因為當時臨近奧運，佢地唱「We are Ready」，唱到變成「Are you Ready?」....
仲唱埋香港始終有你.... 扮粵劇腔口..... 之後又唱埋豈有此理......


成個火車旅程就開始係細路們既「Are you READY?」歌聲之中......